Holy Quran-Arabic Text with Translation in Roman Script

Qur’an Kareem ek aisi mo’jiza kitaab hai jo apni fasahat, balaaghat aur ma’ani ki gehrai mein be-misaal hai. Iska paighaam itna azeem hai ke kisi bhi zaban mein uska poora haqq ada karna namumkin hai. Phir bhi, Allah ke fazl se kuch buzurgon ne yeh zimmedari uthayi aur asaan alfaaz mein tarjuma pesh kiya, jise aam log bhi samajh sakein. Molana  Qari Faheemuddin sahab ka tarjuma bhi isi silsile ki ek qabil-e-taareef koshish hai, jo Urdu zaban mein likha gaya hai aur logon mein kaafi maqbool hai.

Aaj kal bohot se log aise hain jo Urdu bol aur samajh lete hain, lekin Urdu script padhna unke liye mushkil hoti hai. Inhi logon ke liye humne Qur’an ke is asaan tarjume ko Roman Urdu mein pesh karne ka irada kiya hai, taake har shakhs, chahe woh kisi bhi taalimi ya zabaani background se ho, Allah ka paighaam asaani se samajh sake.

Roman Urdu script un logon ke liye bhi faidemand sabit hoti hai jo English padh to lete hain lekin Urdu alfaaz ka matlab samajhne mein mushkil mehsoos karte hain. Yeh tarjuma Urdu lehje mein hai, lekin Roman script ke zariye likha gaya hai, jo isay aur bhi samajhne layak banata hai.

Humari yeh koshish sirf ek tarjuma nahi, balke ek da’wat hai – Allah ka kalam un dilon tak pohchana jo is roohani hidayat ki talaash mein hain.

Dua hai ke Allah Ta’ala hamari is chhoti si mehnat ko qubool farmaye, aur isay sab ke liye hidayat aur rehmat ka zariya banaye. Ameen